. Персональный сайт - Мероприятия / ужрадъёс
Сигаевоысь удмурт лулчеберетлэн шор сюлмыз
Четверг, 13.12.2018, 03:10
ГлавнаяРегистрацияВход Приветствую Вас Гость | RSS

ВИДЕО

Меню сайта

Статистика

Онлайн всего: 1
Гостей: 1
Пользователей: 0

Поиск

Форма входа

Мы смогли, мы сделали

"Ми быгатӥм, ми лэсьтӥм»

Зал чеберъямын пужъятэм ӵушконъёсын, сяськаосын, палэзьпу вайёсын.

Чузъясько Россиилэн но Удмурт Элькунлэн кун крезьгуръёссы. Куноосыз пумитало нянь колдыен, чечыен но перепечен. Сцена вылэ пото ужрадэз нуисьёс  Флор Васильевлэн кылбурысьтыз чуръёсын:

Тырме дыр Волгалы паськытлыкез,

Нош Камаен эшшо луэ кужмо.

Нош мон понна Удмуртитэк

Россия но ӧвӧл!

Таче кылъёс пыр возьматэмын вал милям данъяськеммы асьмелэн пичи вордӥськем интыенымы, усьтэмын вал Удмурт Элькунлы 90 ар но  Сарапул ёросысь Сигаево черко гуртысь удмурт «Кам ӟардонъёс» огазеяськонлы одӥг ар тырмонэз пусъёнлы сӥзем ужрад. Кык ар пала ортчиз ини 2009 арлэн 23 коньывуонысеныз. Ӵапак со нуналэ Сигаево шор ёзо школаын кылдӥз удмурт нылкышноослэн огазеяськонзы. Отчы люкаськизы дышетскись пиналъёслэн анайёссы но песяйёссы. Азьпалазы пуктӥзы ужпум – паськытатоно, калык пӧлы пыӵатоно удмуртъёслэсь сэбедъёссэс, йылолъёссэс.

Нош кызьы ваньмыз кутскиз?

Огазеяськон кылдытон сярысь малпан уськытӥз Степанова Надежда Андреевна, элькунысьтымы удмурт нылкышноослэн огазеяськонэнызы кивалтӥсь, 2007 арын ёросамы Нечкино черко гуртын элькун «Гербер» шулдыръяськонысен.  Вераськем дырысен ортчиз кык ар. Трос сюлэмшугъяським: быгатомы-а, юрттозы-а ёрос кивалтисьёс… Таӵе кышкаммылэн мугез одӥг: Сигаевомы ӟуч гуртэн лыдъяське – вить сюрслэсь трос ӟучъёс, 411  бигэръёс, 410 удмуртъёс. Ульчаысен уд кылы удмурт кылын вераськемез. Семья куспазы 60-70 аресъемёс верасько на ке, 40-50 аресъемёс ваньзэ уг но валало, вераны  но уг быгато. Нош пинал калыклэн валамез но уг поты. Кыӵе со кышкыт: уг тодо анай кылзэс…

Мар веранэз на удмурт калыклэн сэбедъёсыз, йылолъёсыз сярысь. Соос вунэмын. Уг ке тодо анай-атайёссы, кытысь тодозы нылпиоссы? Тодэ лыкто Юлия Байсаровалэн кылбурысьтыз чуръёс:

Та сяммы – удмурт сяммы – ултӥя ик асьмемыз:

Ветлӥськом ӟуч дӥськутэн, малпаськом но ӟуч сямен.

Асьмелэн ни кылъёсмы ӝыныез ӟучомемын.

Пичиесь пиналъёсмы ӟуч кадесь ик луэмын.

Озьы ик вань! Сюлэмез вырӟыто уг соос. Ӵапак возьмато Сигаево черко гуртын улӥсь удмурт калыклэсь асьсэды калыкын возьматэмзэс.

«Ми ке ӧм, кин-о?» - таӵе вазиськон улсын ми кенешим огазеяськыны но кылдытыны удмурт лулчеберетъя центр. Школаын дышетскись пиналъёс но арлыдоос пӧлын ортчытӥмы юаськон: «Кыӵе  сэбедъёс но йылолъёс утисько семьяады?»  Синкылиос ас понназы васькизы валэктонъёссэз лыдӟыса, кылзӥськыса. Со пумысен ик ужамы басьтӥмы удыс - нырысетӥ интые пуктоно семьяосын ужанэз. Н.А.Степанова но одӥгаз ужрадамы озьы ик пусйиз огазеяськонъёслэсь, нылкышноослэсь, анайёслэсь бадӟым кужымзэс удмуртлыкез утёнын но азӥнтонын. Анай йӧлын мед пычалоз анай кыл, анай сям, анай йылол. Солэн ӵектэмезъя ужан удысмес паськытатӥм: выжимы нылпи садъёсы, школае, колледже. Сарапульской политехнической колледжын ужа «Элькунысьтымы калыкъёслэн шудонъёссы» кружок. Соин кивалтэ экономикаен дышетӥсь Наталья Васильевна Батуева, тужгес но сюлмоез ёзчимы. Студентъёс асьсэос гинэ уг дышетско шудонъёсын тырмытыны ваньмон дырзэс, вӧлмыто соосты калык пӧлы пӧртэм ужрадъёсын: герберын, гуждорын, тросиньын. Таяз арын Сарапул карын студентъёс пӧлын нырысьсэ радъям «Гуждор шулдыръяськон» ужрадын басьтӥзы нырысетӥ интыос «Юсь кырӟан» но «Калык шудонъёс, сэбедъёс» номинациосын.

Таин ӵош школаын ужа удмурт кылэз дышетонъя кружок. Нылпиос шумпотыса дышетско ужаны словарен, дышето кылбуръёс, пумиськыло удмурт выжыкылысь батыръёсын.

Удмурт сэбедъёсыз  но йылолъёсыз дышетон радъяське пӧртэм амалъёсын: ӝыт пуконъёс, ӵош пӧраськонъёс, ужрадъёс «Дано лу, дор!», «Нош мон понна Удмуртитэк Россия но ӧвӧл», «Быдӟымнунал (акашка)», «Лекрут келян», «Ымусьтон пӧртмаськонъёс», нимаз классъёсын дышетскись пиналъёсын пумиськонъёс. Отын ёзчиосмы удмурт лулчеберетэз гажан, валан  пыӵатыно тыршо. Удмурт мадёсъёс, пословицаос но поговоркаос пыр возьмато удмурт калыклэсь амало, кужмо но сюлмо луэмзэ.

«Куд ог ёзчиосмылэн биографиоссыя удмурт калыклэн историяезъя быдэс книга гожтыны луоно» - шуэ огазеяськонмылэн кивалтӥсез Нина Николаевна Бехметова. Зэмзэ но озьы.  Трос тунсыкозэ но выльзэ вераз нылпиослы Князева Светлана Андреевна секыт война аръёсы удмурт калыклэн улэмез сярысь. «Ижевск - Балезино» чугун сюресэз лэсьтонын ужамез сярысь мадиз Астапова Нини Григорьевна. Чидантэм секыт ужъёсыз война бӧрсьысь аръёсы колхозын быдэсъямзы сярысь тодэ вайёнъёсыныз люкиськиз Шараборина Надежда Петровна.

 Нимысьтыз висъям потэ вожвылъяськон ужрадмес «Шунды улын шуныт, анай вӧзын  лякыт» (03.03.2011).  Котькуд семья паймытӥз люкаськем калыкез но дунъясьёсыз аслаз аспӧртэмлыкеныз. Пӧртэм сион-юонъёс, эктон-кырӟанъёс, киужъёс, маскаръяськонъёс, сэбедъёс, адӟытонъёс быдэс час ӵоже вошъязы ог-огзэс сцена вылын. Дунъясьёслы – ӧтем куносмылы Соколовкаысь – секыт ик йӧтиз бырйыны устооссэ. Батуеваослэн семьязы тужгэс но паймытӥз вашкала дӥсьёсыз, выжызэс  но йылолъёсыз утеменызы. Выль технологиосты уже кутыны быгатэменызы усто висъяськиз Валиахметоваослэн семьязы. Сюлме пырись кырзанъёсыныз но пиосызлэн кибашлыенызы вормиз Гильзатоваослэн семьязы. Улон шоры капчи мылкыдын учкыны, бускельёсын валче улыны дышетӥз Жижинаослэн семьязы. Бадӟым йылпумъянэз вожвылъяськонлэн луиз эшъяськон, ог-огдэ валан, гажан, силы карон аслэсьтыд выжыдэ. Котькуд семьялы сётэмын вал данъян пус но кузьым.

Та выллем ужрадъёсмы 2 ар куспын люкаськизы 12. Котькудаз пиналъёс но, арлыдоос но тодо мар ке но выльзэ: вунэтэм  сэбед, тунсыко адями, шер  пӧраськись удмурт сиён.  Нош тужгес сӥлыез – шулдыр кырӟанъёс, задор эктонъёс, шуныт верамъёс юртто ваньмызлы капчиен кутскыны выль нуналэз, кужым пыӵато быдэс арнялы. «Куке татчы  лыктӥсько, вань дор сюлмаськонэ вунэ», - шуэ огез эшмы, Майя Николаевна Пермякова.

Оскем потэ – удмурт кыл, удмурт лулчеберет улӟозы Сарапул музъем выламы кезьыт тол бере кечсин сяська сямен. Любовь Тихонова, «Удмурт дунне» газетысь корреспондент, оскыса вераз: «Кам вадьсын ӟардоз». Ми но солы туж оскиськом. Кыле на вань газет лыдзисьёсыз ӧтьыны куное:

«Лыктэ куное милям Сарапул музъем выламы: кылзэлэ «Кам ӟардонъёс»-лэсь уӵы гуръёссэс, тодматске удмурт калыклэн музей-комнатаенымы, шӧмъялэ номырин но ӵошатонтэм перепечмес, сюлмысь вераське удмурт кылын».

 

«Кам ӟардонъёс»удмурт огазеяськонлэн кивалтӥсез Бехметова Н.Н.,

Сарапул ёрос, Сигаево черко гурт.

Часы

Календарь
«  Декабрь 2018  »
ПнВтСрЧтПтСбВс
     12
3456789
10111213141516
17181920212223
24252627282930
31

Архив записей

Друзья сайта
  • Создать сайт
  • Официальный блог
  • Сообщество uCoz
  • FAQ по системе
  • Инструкции для uCoz
  • Все проекты компании

  • Copyright MyCorp © 2018 Создать бесплатный сайт с uCoz